Ukrayina prezidenti Volodımır Zelenskıy çarşenbe künü ABD prezidenti Donald Trampnen telefon vastasınen Trampnıñ mahsus elçisi Stiv Uitkoffnıñ Kremlde Rusiye devletiniñ yolbaşçısı Vladimir Putin ile keçirgen muzakereleriniñ neticelerini muzakere etti.
"Bizim ortaqlarımıznen umumiy mevamımız açıq-aydın: cenk bitmek kerek. Ve bu, namuslı bir bitüv olmalı. Subetke Avropa liderleri de qoşuldı, ve men er biriniñ destegine minnetdarım. Moskvada seslendirilgenlerni muzakere ettik. Ukrayina öz mustaqilligini qorçalaycaq. Epimizge uzun ve emin bir barışıq kerek. Rusiye özü başlağan cenkni bitirmege kerek. Ukrayinağa qoltutqan er keske teşekkürler", — dep yazdı Zelenskıy içtimaiy ağlarda.
Zelenskıy, tam bir yıl evelsi, 2024 senesi arman 6-da Rusiyede başlatılğan büyük arbiy operatsiya çerçivesinde Kursk vilâyetine kirgen Ukrayina Silâlı quvetleriniñ polkunı ziyaret etken soñ, Sumı vilâyetinden Kıyivge qaytqanda, subet olıp keçti.
"Rusiye endi ateş toqtatılmasına daa çoq azır. Basqı olarğa tesir ete. Amma eñ esası — bizni ya da ABD-ni detallerde aldatmasınlar", — dedi o aqşamki nutqunda.
Uitkoff ve Putinniñ körüşüvi, Trampnıñ arman ayınıñ 8-ne qadar Rusiyeden Ukrayina ile barışıq tizmekni talap etken ultimatumınıñ soñuna bir kün qalğanda olıp keçti. Akis alda ABD prezidenti Rusiye ve onıñ ticaret ortaqlarından Amerikağa ketirilgen mallarğa 100 faizlik bergiler kirsetmekni vade ete.
