Rusiye mahkemesi Aqmescit sakinini "devlet hainligi" davası boyunca 18 yılğa üküm etti. Bu aqta yarımadanıñ Rusiye kontrolindeki prokuraturası bildire.
Qayd etilgenine köre, mahküm etilgen adam Kefe civarındaki neft mahsulatlarını qabul etüv noqtasına cisternalı lokomotivniñ avuştırıluvı aqqında malümat toplay edi.
"Qayd etilgenine köre, 2023 senesi boş ayda, mahsus arbiy operatsiyanıñ keçirilmesine qarşı olıp, aqay, Kefe şeeriniñ yanında bulunıp, neft mahsulatı tsisternası ile lokomotivniñ qabul etüv noqtasına barğanı aqqında malümat topladı", — dep aytıla haberde.
Beyanatqa binaen, mabüs areketiniñ videosını ve terminal koordinatlarını Ukrayina Mudafaa nazirliginiñ Baş istihbarat idaresi qullanğan chat-botqa messencer vastasınen yollağan.
Rusiye tarafı mabüsniñ adını ve soyadını, em de onıñ açıq izaatlarını derc etmey.
"KrımSOS" uquq qoruyıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diverssiya teşkil etüv ya da zorbalıqqa çağıruvlar şeklinde qabaatlavlar qullanıldı.