Rusiye Mudafaa nazirligi işğal etilgen Qırımğa yapılğan ücümni izaatladı. Müessiseniñ bildirgenine köre, saba saat 6:20-dan 10:35-ke qadar yarımada üzerinde ava mudafaası 18 uçucısız uçaqnı urıp tüşürgen.
"22 Brânsk vilâyetiniñ territoriyası üzerinde, 18 Qırım Cumhuriyetiniñ territoriyası üzerinde, 2 Smolensk vilâyetiniñ territoriyası üzerinde, 1 Kaluga vilâyetiniñ üzerinde", — dep aytıla haberde.
Arman ayınıñ 7-nde saba Qırımda patlav ve RF Ava mudafaasınıñ çalışmasına oşağan yüksek sesler eşitildi, dep bildirgen edi yerli telegram kanalları.
Bundan ğayrı, yüksek sesli sesler Canköy subetlerinde muzakere etile edi. Olardan birinde Kalinina soqağına tüşken parça aqqında haber etilgen edi. Bu malümatnıñ daa tasdıqlanması kerek.
Ukrayina istihbaratı Ay-Petride Rusiye Federatsiyasınıñ bir sıra radiolokatsiya sistemasını ve Qırımda 02510 "BK-16" leyhasınıñ desant katerini yoq etkenini bildirdi. Faqat ücümniñ künü belgilenmedi.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı “Ukrayina uçucısızlarına” qarşı ateş ve “ava mudafaa sistemasınıñ işi” dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün “esas telüke” dep adlandırdı.